ليلة الحنة على أحدث صيحات الموضة 20

استعرض الموضوع السابق استعرض الموضوع التالي اذهب الى الأسفل

default ليلة الحنة على أحدث صيحات الموضة 20

مُساهمة من طرف ملكة الجرح في الإثنين سبتمبر 21, 2009 10:55 am

نفسك تعملي ليلة حنة على آخر صيحات الموضة علشان تفرحي أنت وأصحابك وبدل ما تفرحي ليلة واحدة تفرحي ليلتين أكيد طبعا نفسك وعلشان إحنا عارفين إن نفسك في كده عملنا لك الحوار الجامد أوي ده مع مدام داليا صاحبة إحدى الشركات المتخصصة لتنسيق الدي جي وليلة الحنة علشان نتعرف منها على كل ما هو جديد عن ليلة الحنة، مش كده وبس ده كمان هنعرف منها أحدث التقاليع الجديدة في ليلة الحنة في البداية عايزين نعرف منك ليه فكرتي تجددي في إستايل ليلة الحنة؟! في البداية أنا خريجة الجامعة الأمريكية، ومن حوالي أربع سنين بدأت أتعرف على إستايلات مختلفة عن ليلة الحنة التقليدية المعروفة في الأصل بأنها عادة فلاحي، وحاولت أخرج من الشكل التقليدي بشكل جديد وفكر جديد وأعمل ليلة الحنة على مستوى مختلف، وبعد كده أصبح عندي شركة متخصصة لتنسيق الدي جي وليلة الحنة، وعندي فريق من البنات متخصصين في تنظيم ليلة الحنة، وبمرور الوقت كل العائلات والبنات تعرفوا عليّ، خاصة أن منظمي ليلة الحنة في مصر قلائل جداً. وإيه دور فريق البنات في تنظيم ليلة الحنة؟! فريق البنات بيكون حوالي 8 بنات ثلاثة منهم للدي جي وثلاثة لفقرات الشو لمساعدة العروسة في فقرات ليلة الحنة, وبنت متخصصة في تصوير الفيديو وبنت متخصصة في رسم الحنة، ده بالإضافة إن البنات المسئولة عن الدي جي في ليلة الحنة بيكون معاهم أحدث أنواع السماعات في مصر سواء النوع الأمريكي أو الايطالي لأنه يمتاز بصوت مجسم، بالإضافة إلى ميكروفون، وبيكون معانا كل الأغاني العربي والإنجليزي القديمة والجديدة على "لاب توب" بدلا من السي دي علشان لو أي حد طلب أغنية معينة بتكون جاهزة في الحال، والعروسة بتكون لابسة في ليلة الحنة فستان قصير أو تي شيرت أو بادي، ده غير الملابس الخاصة بليلة الحنة، وهي اللي بتختار لبس فريق البنات إما يكونوا لابسين كاجوال أو إستايل بلدي عبارة عن جلابية وأحزمة من الشخاليل. وإيه أحدث أشكال ورسومات الحنة؟! البنت المسئولة عن رسم الحنة بتكون من السودان، وده لأن السودان متخصصين في عجن الحنة ورسمها، وبتكون حنة طبيعية وخالية من الكيماويات علشان تحافظ على الجلد، والبنت بتكون لابسة ثوب مختلف ومعاها كتالوج يحتوي على جميع الرسومات، ورسومات الحنة دلوقتي أصبحت جديدة وروشة، فمثلاً فيه رسومات على شكل ورد وفروع شجر وغصن الزيتون، ورسمة على شكل خلخال بيترسم على اليد والقدم ده غير الرسومات الصيني الموضة جداً دلوقتي وبتكون عبارة عن كلمة بحروف صيني لها مــعنى زي كــلمة (إنجل) معناها ملاك، وغيرها من الكلمات التي لها علاقة بالفرح والحب والتفاؤل والرسومات دي بتكون على الذراع والكتف والرقبة والظهر، وفيه كمان رسومات خاصة بالأبراج، ورسومات خاصة من حروف العروسة وزوجها. وهل لون الحنة بيكون مختلف؟! عندنا نوعين من الحنة، الأسود والأحمر، لكن اللون الأحمر بينتهي أسرع من الأسود، والأسود ينتهي خلال أسبوع ويمكن للعروسة أن تتخلص من لون الحنة عن طريق (الليمون). وإيه الأدوات اللي بيترسم بيها الحنة؟! الأول بنجهز خلطة الحنة، وبعد كده نضعها في قرطاس يشبه القمع له سن صغير ونبتدي نرسم على أي مكان في الجسم العروسة تختاره، ونقعد حوالي ثلث ساعة علشان الحنة تثبت. بنسمع عن الزفة الكاريوكي في ليلة الحنة عايزين نتعرف عليها أكتر؟! كلمة كاريوكي معناها (مزيكا بدون صوت) وإحنا بنجهز مزيكا على أغنية يا واد يا تقيل لسعاد حسني مثلاً والعروسة تغني بدلا من صوت سعـاد حسني، وفي الــزفة الكاريـوكي (العروسة بتلبس فستان) قصير يشبه فستان سعاد حسني في أغنية يا واد يا تقيل وبنقدمها من خلال برنامج ليلة الحنة على أنها (سندريلا الشاشة العربية) ده غير إننا عندنا أكثر من موديل العروسة بتختاره ونختار كمان مزيكا لأغاني مختلفة تانية ونخلي أم العروسة وأم العريس يغنوا على المزيكا دي. وإيه فقرات الشو اللي بتنظميها في ليلة الحنة؟! أول حاجة بنبدأ مع العروسة بزفة دمـياطـي لأن الزفة الدمياطي مـشهورة جدا بأغـنـيـة (بسم الله هنبدأ الليلة....) والعروسة بتلبس طرحة وتاج وترقص مع الدفوف وموسيقى الدي جي، بعد كده نبدأ الفقرة الثانية الخاصة بالزفة اللبناني، والعروسة بتلبس إستايل لبناني فيه كل حاجة في الفستان والعقد والخلخال حتى العصايا اللي بترقص بيها مع البنات بتكون مصممة من الطابع اللبناني وبترقص (دبكة لبناني)... بعد كده بنعلن إننا مستعدين للشو الشرقي والعروسة بتكون لابسة بدلة رقص شرقي والبنات اللي بيرقصوا معاها بيكونوا لابسين جلاليب ملونة مطرزة (بخرج النجف) وبعد كده نستعد للفقرة الـثالثة وهي (الزفة الإسكندراني) والعروسة بتلبس فيها برقع وملاية لف. وإيه الفقرات الغربي اللي بتعملها العروسة في ليلة الحنة؟! في الفقرة الغربي بنطلب من العروسة إنها تلبس بدلة (شاكيرا) وبنخلي العروسة تشبه شاكيرا بالضبط في الشعر والماكياج وكل حاجة وبترقص في الفقرة دي أغاني أجنبية مع رقصة الصالصا.... وبعد كده بتلبس العروسة (إسباني) عبارة عن بدلة ملونة بألوان كثيرة مع شابوه كبير فيه مجموعة من الفاكهة والورود.... وبعد كده نستعد (للشو الهندي) وتلبس العروسة ثوب هندي مطرز بالسيرما مع الإكسسوار الخاص بالهنود وبيرقصوا معاها أصحابها رقصات هندي.. أما الشو (الهاواي) وهو مأخوذ من جزيرة هاواي وبتلبس العروسة فيه تايير ملون من قطعتين مرصع كله بالورود وبتلـبس (شخاليل) في إيديها وترقص على مزيكا خاصة من جزر الهاواي... أما آخر شو بيكون الشو الفلاحي وبنرجع فيه للأصل وبيكون عبارة عن صينيه ليلة الحنة مزينة بالحلقان والإيشاربات والشخاليل وطبق فيه حنة وشمع وبترقص العروسة مع أصحابها على الأغاني الخاصة بأفراح الريف وبتكون ماسكة البلاص زي البنت الريفية بالضبط، ونهاية الشو العروسة بتطفي شمع ليلة الحنة ومعناها إن الليلة خلصت. كلمينا عن اختراعك لفكرة البوستر الخاص بالعروسة ليلة الحنة؟! أنا باعمل حاجة جديدة أول مرة تتعمل في مصر اسمها (البوستر) وهو عبارة عن بوستر كبير 2 متر × 120 سم وبيكون عليه شكل (عروسة كاريكاتير) تكون لابسة فيه فستان فرح قصير وشكلها لذيذ ومكتوب على البوستر كلمة كبيرة اسمها (هاتجوز) في آخر البوستر بنكتب اسم (روش للعروسة) والعروسة هي اللي بتختاره زي مثلاً قطوطة, سمسمة, بندقة..... وبعد كده أصحابها البنات بيكتبوا على البوستر كلمات خاصة للعروسة زي بنحبك – أنت جميلة – عقبالنا وهكذا... وبـتكون الكلمـات دي زي اللي بتتكـتب عــلى (جيست بوك) وبعد كده العروسة بتاخذ البوستر وتحتفظ بيه في بيتها. إيه أحدث التقاليع في ليلة الحنة؟! أحدث فكرة في ليلة الحنة اسمها "البنياتا" وبتكون على شكل عروسة مصنوعة من الفوم شعرها أصفر، ومصنوعة من الكرتون ومجوفة من الداخل، ونملاها مجموعة من الهدايا والشيكولاتة وبنعلق "البنياتا" في مكان عالي شوية، وفي نهاية ليلة الحنة بنخبطها وبعدها بتتفتح وتنزل منها الهدايا على الأرض وأصحاب العروسة يتسابقوا ويأخذوا الهدايا والحاجات الحلوة الموجودة داخل "البنياتا". هل فيه إضاءة أو ديكور معين يناسب ليلة الحنة؟! مكان ليلة الحنة بيكون في شقة بيت أهل العروسة أو قاعة في فندق أو نادي ومفيش إضاءة أو ديكور معين لأننا بنركز أكثر على الشو والرقص اللي موجود في الفقرات الخاصة بليلة الحنة، لكن أنا باعمل فكرة "البابليز" وهي عبارة عن ماكينة صغيرة بتعمل بالونات بتطير في الهواء وبتشتغل بالكهرباء وبتكون موجودة أثناء الشو. أخيرا... هل طقوس ليلة الحنة في مصر بتشبه طقوس الحنة في البلاد العربية؟! أنا حضرت أفراح في دولة "اليمن" على سبيل المثال وليلة الحنة عندهم بتكون مختلفة والعروسة بتلبس ثوب أخضر وبترقص على أغاني عربية وخليجية وبتكون عائلية فقط، أما الفرح فبيكون فرح نسائي فقط بدون رجال وبيكون في قاعة كبيرة فـيـهـا حـوالـي 750 سيدة ومعاهم (دي جي سيدة) وبيعملوا ديكور بالإضاءة والليزر والدخان. ودلوقتي جه دوركم عايزينكم تقولوا لنا على رأيكم وعن أغرب ليلة حنة سمعتوا عنها وياريت نعرف كمان كل بنت نفسها ليلة الحنة بتاعتها تكون عامله إزاي __________________
avatar
ملكة الجرح
افضل عضو
افضل عضو

رسائل sms مجانا : [table style="WIDTH: 96px; HEIGHT: 86px" border=1][tr][td]

يدا بيد نسعى لرقي منتدانا[/td][/tr][/table]

الجنس : انثى

عدد المساهمات : 1057
النقاط : 2544
التقدير : 10
تاريخ التسجيل : 29/07/2009

الرجوع الى أعلى الصفحة اذهب الى الأسفل

default رد: ليلة الحنة على أحدث صيحات الموضة 20

مُساهمة من طرف jana في السبت يوليو 02, 2011 10:22 am

طب ابعتيلي رقمك وايميلك ضرووووووووووري
avatar
jana
عضو جديد
عضو جديد

رسائل sms مجانا : [table style="WIDTH: 96px; HEIGHT: 86px" border=1][tr][td]

يدا بيد نسعى لرقي منتدانا[/td][/tr][/table]

الجنس : انثى

الجدي
عدد المساهمات : 1
النقاط : 1
التقدير : 1
تاريخ الميلاد : 25/12/1989
تاريخ التسجيل : 02/07/2011
العمر : 27
مزاجك مزاجك : 3aaaaaaaysh

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى